Raaiselagtige verdwyning van Sinoville-man laat soekers kopkrap

Blessing Obinna

17 hours ago

“Nag, Bokkie. Ek gaan nou slaap. Die krag is nog steeds af.”

Dit was die laaste woorde wat Jacque du Toit Sondagaand met haar man, Gielie, gepraat het. Skaars 12 uur later is sy bakkie verlate op die Swadini-pad gevind en het hy spoorloos verdwyn.

Machiel (37) is ’n boukontrakteur van Sinoville, Pretoria, wat met ’n projek by die Acornhoek Mall besig was. Volgens Jacque het hy tydelik op Kampersrus gebly, sowat 30 km van die bouperseel af.

Machiel se neef, Gideon Engelbrecht, is tans in Acornhoek om met die soektog te help. Hy het vanoggend, 8 Januarie, gesê hulle het nog geen spoor van Machiel gevind nie, maar is in samewerking met die polisie en die Kampersrus-plaaswag besig om alle leidrade op te volg.

Lees ook:

Du Toit is Maandagoggend omstreeks 05:15 by Kampersrus weg, en daar is nie weer enigiets van hom gehoor nie. Met behulp van die opsporingsapparaat in sy Mahindra-bakkie is dié omstreeks 09:00 op die Swadini-pad gevind.

Wat egter vreemd was is dat die bakkie heeltemal in die teenoorgestelde rigting as die Acornhoek Mall gevind is. Dit was nie gesluit nie, daar was geen tekens van struweling nie en die sleutels was steeds daarin.

Net Machiel en sy selfoon was weg, maar nog geen sein kon daarvan opgepik word nie.

Engelbrecht wou nie verdere inligting bekendmaak oor onder meer waar Machiel se ander persoonlike besittings, soos sy beursie, was nie. “Daar is baie vrae en daar is sekere inligting wat nie tans bekendgemaak kan word nie,” sê hy.