Die sanger Armand Hofmeyr is in sy noppies nadat sy profiel op die sosiale media platform TikTok herstel is.
Die profiel is verlede week gesluit oor die verskyning van ’n video oor sy jagekspedisie.
In die beeldmateriaal, is gewere en ’n dooie voël duidelik sigbaar.
Die video wat tot die herrie gelei het, is egter nie meer op Hofmeyr se profiel nie.
Hy het aangedui hierdie skorsing is volgens hom onregverdig en sou appèl aanteken.
’n Tik Tok-profiel kan sewe dae na so ’n skorsing herstel word indien die administrateurs van die platform so besluit.
“Ek het beslis beswaar daarteen gemaak. Ek wou nie al die inhoud wat ons met moeite opgebou het, verloor nie,” meen Hofmeyr.
Hy het nadat sy profiel geblok is op Facebook aan sy bewonderaars verduidelik dat hulle nie meer van sy video’s op TikTok sal kan kyk nie.
Verskeie dierewelsynsorganisasies soos die Dierebeskermingsvereniging en Ban Animal Trading het standpunt ingeneem met die skorsing.
Die organisasies is ten gunste van TikTok se reëls oor jagvideo’s en dat dooie diere nie op die platform gewys mag word nie.
Hofmeyr het grepe uit die video op Facebook gewys wat sy jagekspedisie saam met vriende op Roedtan in die veld toon.
Hy verduidelik dat hy in die bosveld grootgeword het. Die voëljag-ekspedisie is ’n jaarlikse instelling saam met vriende en familie.
Die jagtog word veral aangepak volgens Hofmeyr om tarentale te verhoed om saad tydens die plantseisoen op te vreet.
“Ek het vir jare nie KFC geëet nie. Ek eet tarentaalvleis al my lewe lank.”
Gewere is deurlopend te sien op die video en Hofmeyr hou ’n dooie tarentaal in sy hande vas.
Profiele op TikTok kan verwyder word wanneer gemeenskapsreëls oortree word.
’n Profiel kan ook afgehaal word wanneer iemand aangegee word vir inhoud wat aanstoot gee.
Hofmeyr het aan Rekord gesê hy is bly oor die herstel van sy profiel.
“Ek het wel ’n les geleer. Sommige mense kan jou aangee en dan word jy geblok,” se die sanger van treffers soos “Partytjie Slaap Herhaal” en “Marie”.
Hy is ook die seun van bekende sanger Steve Hofmeyr.
Hy is egter steeds gegrief omdat daar volgens hom veel erger video’s te sien is op TikTok waaraan daar niks gedoen word nie.
“Ek dink steeds mense moet leer wie ek is en my nie oordeel omdat hulle dink ek is iets of iemand anders nie.”
Hofmeyr voel hy wil erken word vir wie hy werklik is. Hy wil nie volgens ander se verwagtinge van hom lewe nie.
“Ek jag, doen sokkie-musiek, is lief om te kuier en lewe my eie lewe. Ek is niemand se soet seuntjie nie.”
Sy profiel op TikTok het voor die skorsing op 25 000 TikTok-gebruikers gestaan. Na die tydelike skorsing het die getal tot oor 27 000 gestyg.
Hofmeyr voltooi tans ’n landwye toer op 4 Augustus in Kaapstad.
Sy nuwe enkelsnit word eersdaags uitgereik maar voorlopig word die titel geheim gehou.
“Dit gaan my beste sokkie-treffer ooit wees,” sluit hy af.
Moot-inwoner val in mangat toe plastiese deksel meegee
Het jy dalk meer inligting rakende dié storie? Stuur gerus vir ons ‘n epos na [email protected] of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram blaaie.